२०७६ फाल्गुन १०, शनिबार
Follow Us on:

बंगालको खाडीमा डुंगा डुब्दा १५ जनाको मृत्यु

ढाका: बंगलादेशको तटपारी डुङ्गा दुर्घटना हुँदा कम्तीमा १५ रोहिङ्ग्या शरणार्थीको ज्यान गएको छ ।

बंगलादेशबाट भागेर मलेसिया जानेक्रममा १३० जना चढेको डुङ्गा बंगलादेशको तटपारी बंगालको खाडी क्षेत्रमा रहेको सेन्ट मार्टिन टापुनजिक डुबेको बंगलादेशको तटरक्षक फौजले जनाएको छ ।

डुङ्गामा चढेकामध्ये ७० जनाभन्दा धेरैलाई उद्धार गरिएको जनाइएको छ । ५० जना क्षमताको डुङ्गा बंगलादेशको तटीय शहर कक्स बजारबाट मलेशिया जानका लागि हिँडेको बताइएको छ । क्षमताभन्दा धेरै यात्रु बोकेका कारण डुङ्गा डुबेको हुनसक्ने बंगलादेशी अधिकारीको आशंका छ ।

मारिनेमा महिला र बालबालिका समेत छन् । सन् २०१७ मा म्यान्मारको सेनाले मुसलमान धर्मावलम्बी रोहिङ्ग्या जनजातीलाई लक्षित गरी कारवाही चलाएपछि लाखौं रोहिङ्ग्याहरु हाल बंगलादेशमा शरणार्थीका रुपमा बसोबास गर्दै आएका छन् ।

यद्यपि बंगलादेशको शरणार्थी शिविरको अवस्था दयनीय रहेका कारण हरेक वर्ष हजारौं रोहिङ्ग्याहरु खतरनाक बाटो प्रयोग गरी ज्यान जोखिममा राखेर बंगालको खाडीबाट मलेशिया जाने गरेको बताइन्छ ।

यो पनि पढ्नुहोस्

प्रतिक्रिया दिनुहोस

Your email address will not be published. Required fields are marked *