२०७७ असार १८, बिहिबार
Follow Us on:

धादिङ सिद्धलेक हिटी बस्ने २३ वर्षीया गर्भवती महिला कोरोना संक्रमित भएपछि गाउँ नै सिल !

संक्रमित २३ वर्षिय गर्भवती बस्ने हिटी गाउँ सिल

धादिङ: धादिङको सिद्धलेक गाउँपालिको ५ हिटी गाउँ सिल गरिएको छ । स्थानीय एक महिलामा कोरोना भाइरस संक्रमण पुष्टि भएपछि गाउँ सिल गरिएको हो ।

धादिङको सिद्धलेक गाउँपालिका-५ हिटीकी २३ वर्षीया गर्भवती महिलामा कोरोना भाइरस पोजेटिभ देखिएपछि जोखिम न्युनिकरण गर्न र थप फैलन नदिन गाउँ नै सिल गरिएको हो ।

सिल गरिएको क्षेत्रमा वडा नं.५ कुम्पुर हिटी गाउँको पूर्वमा गनगने चौतारा, पश्चिममा चिप्ले डाँडा, उत्तरमा सुकौरा खोला र दक्षिणमा आँख्ले चौतारो बीचको सीमाक्षेत्र रहेका छन् ।

सिद्धलेक गाउँपालिकाका अध्यक्ष प्रेमनाथ सिलवालसहित बसेको जिल्ला सुरक्षा समितिको बैठकले गाउँमा स्थानीय प्रशासन ऐन अनुसार सिल गरी निषेधाज्ञा जारी गरिएको धादिङका प्रमुख जिल्ला अधिकारी एंव जिल्ला सुरक्षा समितिका संयोजक आस्मान तामाङले जानकारी दिए ।

कोरोना संक्रमण देखिएकी महिला गत जेठ १४ गते जिल्ला अस्पताल धादिङबेसी आएकी थिइन् । उनलाई आफन्तले थप उपचारका लागि थापाथलीस्थित प्रसूतिगृह लगेका थिए । उपचारका क्रममा उनलाई त्यही संक्रमण देखिएको थियो ।

गाउँकी स्थानीय महिलालाई कोरोनाको संक्रमण देखिएपछि वडा अध्यक्ष दिलबहादुर घलेको संयोजकत्वमा संक्रमित महिलाको यात्रा विवरण र सम्पर्क रहेका व्यक्तिको खोजपहिचान कार्य सुरु गरिएको छ ।

सिल गरिएको गाउँमा अहिले सशस्त्र प्रहरी र नेपाल प्रहरी परिचालन गरिएको छ । सिल गरिएको क्षेत्रमा जेठ २४ गते रातिसम्म कसैलाई हिँडडुल गर्न र उक्त क्षेत्रमा बाहिरबाट प्रवेश गर्न समेत रोक लगाइएको छ ।

संक्रमित महिलाको सम्पर्कमा आएका सबै व्यक्तिको पीसीआर परिक्षण गरिने अध्यक्ष सिलवाले जानकारी दिए ।

धादिङ जिल्लाका स्थानीयमा देखिएको यो चौथो संक्रमण हो । जिल्लाका १३ पालिकामध्ये नेत्रावती डबजोङ,गल्छी, थाँक्रे र सिद्धलेक गाउँपालिकामा संक्रमण देखिएपनि अन्य नौ पालिकामा कुनै संक्रमण देखिएको छैन ।

धादिङ जिल्लाका चारजनामा संक्रमण देखिएकामा तीन जना उपचारपछि घर फिर्ता भइसकेका छन् ।

यो पनि पढ्नुहोस्

प्रतिक्रिया दिनुहोस

Your email address will not be published. Required fields are marked *